राजस्थानमध्ये अडकलेले बीडचे विद्यार्थी सुखरुप परतले
बीड : राजस्थान राज्यातील कोटा येथे राज्यभरातील हजारो विद्यार्थी शिक्षणासाठी गेलेले होते. यामध्ये बीड जिल्ह्यातील 55 ते 56 विद्यार्थ्यांचा यामध्ये समावेश होता. कोरोनामुळे लॉकडाऊन केल्यानंतर ही सर्व विद्यार्थी राजस्थानमध्येच अडकून पडली होती. मंगळवारी दुपारी हे सर्व विद्यार्थी बीडमध्ये सुखरुप दाखल झाले.
दहावी, नीट, जेईई आदी शिक्षणासाठी महाराष्ट्र राज्यातून अनेक विद्यार्थी राजस्थान राज्यातील कोटा येथे गेले हेाते. यामध्ये बीडमधील 55 ते 56 विद्यार्थ्यांचा समावेश होता. यासंदर्भात राज्य शासनाने दखल घेवून बीडसह राज्यातील इतर जिल्ह्यातील विद्यार्थ्यांना स्वगृही आणण्यासाठी प्रयत्न सुरू केले होते. जिल्हा प्रशासनानेही यासाठी पाठपुरावा केला होता. राज्य सरकारच्या परवानगी नंतर या विद्यार्थ्यांना आपआपल्या जिल्ह्यात आणण्यासाठी यंत्रणा कामाला लागली होती. मंगळवारी दुपारी 4.30 वाजण्याच्या सुमारास कोटा ( राजस्थान ) येथे अडकलेल्या बीडच्या विद्यार्थ्यांना जिल्ह्यात आणण्यात आले. एका खाजगी ट्रॅव्हल्सने या विद्यार्थ्यांना बीड बसस्थानकाच्या पाठीमागील रोडवर आणण्यात आले. याठिकाणी शिवाजीनगर पोलिसही दाखल झाले होते. दरम्यान लॉकडाउनमुळे कोटा येथून अडकलेले विद्यार्थी परत आल्याने कुटुंबियांना मोठा दिलासा मिळाला आहे.
