अभिनेता इरफान खान यांचं निधन

अभिनेता इरफान खान यांचं निधन
मुंबई : बॉलिवूड अभिनेता इरफान खान दीर्घ काळापासून न्यूरो एन्डोक्राइन ट्यूमर नावाच्या आजाराशी झुंज देत होता. इरफानची प्रकृती अचानक बिघडल्यानंतर त्याला तातडीने मुंबईतील कोकिळाबेन रुग्णालयात दाखल करण्यात आले होते. आयसीयूत त्याच्यावर उपचार सुरु असतांना उपचारदरम्यान त्याचं निधन झाले. यापूर्वी इरफान खान परदेशात असल्याचे सांगण्यात येत होते, पण आता तो मुंबईत असल्याचे स्पष्ट झाले आहे. अलीकडेच त्याच्या आईचे जयपूरमध्ये निधन झाले. आणि त्याला लॉकडाऊनमुळे जयपूरमध्ये आईच्या अंत्यसंस्कारात सहभागी होता आले नाही. व्हिडिओ कॉन्फरसिंगद्वारे इरफानने आपल्या आईचे अंत्यदर्शन घेतले होते. इरफान खानने 16 मार्च 2018 मध्ये आपल्या आजाराविषयी खुलासा केला होता. मला ’न्यूरोएन्डोक्राईन ट्यूमर’ झाल्याचे समजले. सध्या तरी कठीण झाले आहे. पण माझ्यासोबत असलेल्या व्यक्तींचे प्रेम आणि सामर्थ्यामुळे माझ्यात आशेचा किरण निर्माण झाला आहे. मला उपचारांसाठी परदेशात जावे लागणार आहे. मला शुभेच्छा पाठवत राहा, अशी विनंती करतो, असं इरफाननं म्हटलं होतं. त्यानंतर या आजारावर उपचार करण्यासाठी तो लंडनला गेला होता. दहा महिन्यांनी इरफान उपचार पूर्ण करुन मायदेशी परतला होता. आपल्या आजारातून सावरत ’अंग्रेजी मीडियम’ या चित्रपटाचे चित्रीकरणही केले होते. आज सकाळी मुंबईतील कोकिळाबेन रुग्णालयात उपचारासाठी दाखल केल्यानंतर त्याची प्राणज्योत मालवली.